susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Buhameen argiak, kaskaroten ilunak | Hazia »

Ordaina zor nizun / Joxemari Urteaga / Elkar, 2001

Ordaina zor nizun Aitor Mendiluze / Euskaldunon Egunkaria, 2002-03-07

Liburu bat gomendatzeko eskatu didate. Eta ez nuke egin nahi, ez nuke bat gomendatu nahi; are gehiago, ez nuke bat ere gomendatu gabe utzi nahi. Irakurtzea beti da ona, zernahi irakurtzen dela ere. Gero bakoitzak asmatu behar du irakurritako hura bere moduan ulertzen, ados edo kontra egoten, misterioaren erantzuna aurkitzen saiatu edota liburuari sorpresa ematen uzten, nolabait ere irakurtzen duen hura barneratzen.

Hala ere, inork liburu guztiak irakurri nahiko balitu egin beharko lukeen legez, hasteko bat aukeratu behar eta azkena irakurri dudan liburua gomendatuko dizuet, ez agian irakurri ditudan guztietatik gehien gustatu zaidana izan delako, irakurri dudan azkena izan eta gustatu zaidalako baizik. Liburua Joxe Mari Urteagaren “Ordaina zor nizun” da. Egia esan, nik bi egunetan irakurri dut, kontakizun motza ez izan arren, eta, gustuko liburu guztiekin gertatzen zaidan legez, pasarte bakoitzak hurrengoaren gosea pizten zidalako. Gainera, beti izan ditut gustuko misteriozko eleberriak, eta liburu honetan aurkitu dudanak dudan mantentzea lortu du azken unera arte, lehen esan bezala hurrengo pasartean galderaren erantzuna bilatzera bultzatuz. Oso liburu entretenigarria iruditu zait, erraz jarrai daitekeen kontakizuna. Liburu guztiak irakurri nahi dituenarentzat ez da abiapuntu txarra, eta batzuk irakurtzearekin konformatzen denarentzat, aukera polita da beharbada.