« Bizi poza | Euskal epikureismoa proban »

Anarkia hutsa / Woody Allen (Oskar Arana) / Meettok, 2007

Anarkia hutsa Goizalde Landabaso / Radio Euskadi, 2008-04-20

Gustatzen zaizkit Woody Allenen pelikulak. Batzuetan. Irakurri ditudan bere idatzi eta hausnarketak ere gustatzen zaizkit. Batzuk, behintzat.

Anarkia hutsa lanetik nabarmendu nahi nuke lehenengo gauza da itzulpen lana. Itzel gustatu zait. Eta pentsatzen dut lan ederra izan duela Allen jaunaren esaldi luze eta, sarri, korapilatsuekin.

Gustatzen zaizkit Allenen ironia, begirada; badu modu berezia denari buelta emateko, kritika zorrotzak egiteko, astinaldi ederrak emateko. Eta honetan ere egin da, ez da salbuespen.

—Jainkoarren ez al duzu VARIETY irakurtzen? Ginea-Bissauko lehiatiletan dirurik gehien eman zuen filma egin nuen. / — Egia esan ezagunagoa dut literatur mundua. / — Bai, badakit. Hain zuzen horregatik egon nahi dut zurekin. / — Nola lortu duzu nire telefono zenbakia? Ez dago telefono-zerrendatan. / — Interneten lortu dut. Han dago zure kolonoskopiarekin batera.

Egilearen aurpegia azal bihurtzen duten liburuek apur bat botatzen naute atzera. Hau ere ez da salbuespen. Eta gogorarazi dit Allen jauna gorabeheratsua dela. Narraziotan ere bihurguneak ikusten dira. Bere absurdukeriak batzuetan goren-gorenekoak dira, eta seriotasun oro apurtzeko gai da. Beste batzuetan, berriz, arruntegia begitantzen zait. Ohikoegia; barka iezadazu esatea, baina, errezegia.

Badut lankide bat esan eta esan egiten didana egilea eta bere lana bereizten ikasi behar dudala. Allenekin askotan esan dit. Bera gauza bat dela eta bere lana beste bat. Gutxitan lortzen dut bereizketa. Azken batean orain artean ez nau itsutu gizon honek, bere zineak ere ez; ez eta liburu honek ere.