susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egiaren egarriz | Espaloian dago munduaren xilkoa »

Hamairu ate / Hainbat egile / Elkar, 1985

Hamairu ate Edorta Jimenez / Susa, 1989-06

Errealitatea bera den ogi gogorrari haginekin ekingo bazaio —eta halaxe ekin ei behar zaio— hagin gogorrak beharko dira. Haginik gogorrena, aldiz, urrezko urre beltzaz babesturikoa ei denez, halaxe ekin izan dio hainbatek eta hainbatek, okinek mundua asmatu zutenik hona, umore ilunez. Andre Breton porru-saltzaile bikainak igoarazi zuen hagin hau “arteen” elitera, umore beltzaren antologia antologikoa argitaratuz. Hagina, ordea, ez da alferrik galdu handik honako bidean. Ogirik bigunena bera ere gogorregi egiten den ziegan —hara berton Cesar Vallejo gogora ekartzeko aukera ezin hobea— beltzago zorroztu dute hagina Joseba Sarrionandia eta Mitxel Sarasketak, “Hamairu ate” izeneko antologia hau atonduz.

Hamahiru egile hautatu dituzte antologiarako itzultzaileek. Zenbakiak berak ere ikara eragiten diolarik askori, nork daki ez ote duten azken txantxa egin gura izan honetan. Bestalde, zati luzeak nahiz laburrak bildu badituzte ere, laburrak dirateke atseginenak, umore beltza laburrean gauzatzen baita —begiratu besterik ez dago, ehun metroko frogetan izaten direla txapeldunak beltzak, luzeagoetan ingelesak eta portugesak diren bitartean—.

Hortxe dituzu, bada, Ambrose Bierce, Munro, Francis Picabia, Kafka, Jaguiwara, Anibal Machado, Max Aub, Carrington, Virgilio Piñera, Kostas Axelos, G.G. Marquez, Pere Calders eta Gonzalo Suarez, hamahiru ateak. Irtenbide bakarra, aldiz, barre mingotsa da.