Mattin Mottela / Jose Mari Satrustegi / Ibaizabal, 2001

Ipuinak Javier Rojo / El Correo, 2001-12-26

Jose Mari Satrustegik Nafarroako Sakana aldean bildutako ipuin sortaren aurrean jartzen du irakurlea “Mattin Mottela-n”. Liburuaren izenburuan aipatzen den pertsonaia honek, herri literaturan hain ezaguna denak, ezaugarri batzuk biltzen ditu bere baitan herri xehearen gustukoa izateko.

Indartsuak, indartsuak izateagatik ez beste arrazoirengatik, beti garaile gertzatzen diren mundu batean, halako mendeku txikia ikus daiteke pertsonaia honengan, zeren, indartsua eta boteretsua izan gabe, adimena eta abildadea erabiliz (non ez diren iruzurra eta amarruak) boteretsuen aurrean garaile ateratzea lortzen baitu.

Ipuinak beregainak badira ere, protagonistaz gain bestelako barne lotuak ere erakusten dituzte. Ipuin sorta honek nobela izateko bidean dagoela ematen du, beraz. Liburua osatzeko, Mattin Mottelaz aparte, Satrustegik horren ezpalekoak diren beste protagonista batzuk ere hautatu ditu, herri literaturan honelako pertsonaiak behin baino gehiagotan agertzen baitira. Eta bata zein besteak ahozko tradiziotik hartuta dauden arren, ipuin guztietan idazleak irakurtzeko aldaera egin du, baina kontalari-senari esker, ahozko literaturaren ezaugarriak mantenduz. Entzungo balira bezala irakurtzen dira-eta.