« Ez dira batere arinak gazteen kezkak | Bizinahia ez da berria »

Lehortean / Gotzon Garate / Gero, 2001

Istorio garratzak Javier Rojo / El Correo, 2001-11-14

Gotzon Garate erdi ahaztuta daukagun idazlea da, batez ere azken urteotan literaturan oso gutxitan aritu baita. “Lehortean” izeneko ipuin bilduma honek, adibidez, hogei urte baino gehiago bete ditu dagoeneko. Izan ere, lehenengo aldiz argitaratu zenean 1980. urtea zen. Orain, berriro eskura dezakegularik, Gotzon Garate ipuingilea idazle trebea eta interesgarria, alor honetan arrazoirik gabe baztertu samarra, dela kontura gaitezke. Irakurleak ipuingintzaren maisu klasikoen oihartzunak topatuko ditu istorio hauetan, naturaltasun osoarekin asimilatutako tradizio baten isilu. Ipuin gehienak errealismoaren esparruan eginda daude, eta askotan bizitzaren alderdirik mingots eta bortitzenak agertzen dira. Noizean behin, ordea, umoreari, gehienetan paradoxaren mozorropean izkutatutako umoreari ere, tartetxo bat uzten dio idazleak. Ezin uka daiteke, ipuin hauek egitean, zenbait gaik biziki kezkatzen dutela idazlea. Adibidez, behin eta berriro agertzen den gai horietako bat legea, araua edo dena delakoa haustearen ondorioz sortzen den endekatze morala dugu, biak gertaera bakarraren bi agerpen bailiran. Bestaldetik, idazle gutxik daukate Garatek duen trebezia, beti adjektiborik egokiena eta irudirik bereziena ere aurkitzeko.