Trenean / Mirentxu Etxezarreta / Gipuzkoako Foru Aldundia, 1987

Trenean Dabid Zuazalde / Argia, 1988-06-12

Liburu honek Gipuzkoako Foru Aldundiko Kultura Sailak antolatu Lehen Gazte Literatur lehiaketako bigarren narratiba saria jaso zuen 86.ean. Jakina, irakurleak galdetuko duen lehena: zer dela eta datoz bi urteko atzerapenaz liburu hau komentatzera?

Izan ere, aurreko batean liburu hau bezala beste batzu, merketxo, beherapenetan baileuden, saltzen zituztela eta harritu egin ginen. Agi denez, lan sarituok liburutegi publikoetara banatu ziren eta sobranteak oraintsu jarri dira salmentan, sikiera etekinen bat erdiestearren.

Betiere gutxi bada ere, hainbesterainoko euskal liburu produkzioan inoiz gelditzen dira liburu jatorrak inolako erreseinarik gabe. Besteak beste, hau litzateke horietakoa. Tamainaz erdibideko lan honek frogatzen duena zera da, literatur sariketa oroz gain, idazle gazte ezezagun piloaren artean, tapaturik gera daitezkeela promesa tankerako idazleak.

Tamalez diogu, ze kasu honetan istorioak merezi du, guri behinepein gustatu zaigu. Bai istorio aldetik —hiritik estudiatzetik herrirainoko bidai ironiko-oniriko bat egiten du protagonistak, hainbat eszena-sorpresarekin egiten duelarik topo—, bai idaztankera aldetik: oraindik samurra, fresko, espontaneoa —goierritarkeria bat edo beste tartean—.

Jario bikaina duela frogatu du Mirentxuk, eta hori ez ezik literatur errejistro eta teknina ezberdinak menperatzeko ere gai dela, esate baterako epistolarioa. Berandu samar izan arren, bihoakio idazlesa honi gure animorik beroena, erakutsi bait du balio duela. Ea laister beste zerbaitekin barre egin arazten digun; eta ea piskanaka emakume idazleen plantila handiagotzen den.