susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Filme laburren bilduma etxean ikusteko modua | Cristaubaren icasbidea edo Doctrina Cristiania »

Perla / John Steinbeck (Ruper Ordorika) / Elkar, 1988

Perla Dabid Zuazalde / Argia, 1988-04-17

Euskal literaturan, azken urteetan idatzi diren nobela gehienak eta ezagunenak nobela laburrak izan dira, eta genero horretan munduan zehar obra ezagunik baldin bada “Perla” litzateke ospetsuena, seguru asko, euskal itzulpenean 100 orrialde hartu dituen liburua.

Obra honi istorioaren indarrak ematen dio ospea, indarrak eta hunkigarritasunak.

Izan ere, miseria gorritik atera nahi duen arrantzalearen, emaztearen eta bien semetxoaren abentura odisea berri bat bait da. Familiaren eta maitasunaren indarrez gizarteko agintarien eta gaiztakeriaren kontra giza duintasunaren alde borrokatzen direnen parabola. Indar dramatiko izugarria hartzen du aldika eta barrenak hunkitzen dituen samurtasunez dago idatzia.

Mami eta azalaren arteko batasun efektua lortuz —literatur lan orok bete behar lukeen helburua— Steinbecken prosak estilo berezia du, koordinazioaren errepikapenak ematen dion erritmo goren hori. Honetan aipatzekoa da Ruper Ordorikaren ahalegina: esan digutenez, orain artean ezagutu ditugun erdal itzulpenek testua “hobetu” egiten zuten bere kasa, eta Ruperren euskal itzulpen hau berriz, askoz estuago atxekitzen omen zaio jatorrizkoari.

Egunero ez da nobel saridun bat euskaraz agertzen eta beraz poztu gaitezen.