susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Zainetan murrailak | Bihotz apala »

Kama-Sutra / Anonimoa (Ramon Etxezarreta) / Elkar, 1987

Kama-Sutra Xabier Mendiguren / Argia, 1988-01-24

Azkenaldian morborik sortarazi duen libururk izan bada hauxe izan da. Euskal liburuez sekula arduratu ez diren komunikabideak honen berri ematen aritu ziren, eta Sabrinaren mailara iritsi ez bazen ere, egun batzuez Ramon Etxezarreta izan genuen fribolotasun edo keriaren errege edo erregina. Nik ez dakit guzti hori onerako edo txarrerako izango den baina bego horretan.

Argitalpen horren historia aski ezaguna da eta hobe dugu inuxentekeriez hitz egiteari uztea, hura pasatu bait zen, eta liburua berriz hementxe dago. Seguru asko ez du beteko jende askorengan sortutako espektazioa, Ramonek berak aurkezpenean esaten zuen bezala ez bait dakar beste munduko zerarik, hanka bat goraxeago edo belauna beheraxeago jarri behar den eta holakoak. Horren lagungarri eta liburuaren apaingarri badira han-hemenka irudi batzuk, baina ez dakit horiek aintzat hartuz gero ez ote duzuen hezurren bat bihurritzeko arriskua izango.

Momentuko sukar horiek pasatuta, liburua patxadatsuago irakurtzen komeni litzateke, herri urrun baten kulturaren adierazgarri nagusienetako bat bait da, eta alderdi horretatik gurearen aberasgarri.