susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Saizarbitoriari buruz | Lekukotasun zirraragarria »

Bapatean 93 / Askoren Artean / EHBE, 1994

Erradiografiarik fidelena Joxe Beristain / Euskaldunon Egunkaria, 1994-09-11

Ez da erraza liburu honi buruz ezer berririk esatea Aingeru Epaltzak ezarri dion hitzaurre ederra irakurri ondoren. “Gaurko bertsolaritzaren erradiografiarik fidelena bere orrialdeek eskaintzen digute”, dio, besteak beste, Epaltzak, baieztapen hau gehiegizkoa dela leporatuko ote dioten beldur agertuz. Ez dut nik uste gehigizkoa denik, eta ziur naiz bertsozale asko dela Epaltzarekin bat datorrena, nahiz eta, zoritxarrez, oraindik ere bertsozalean eta liburuen artean halako urruntasun bat dagoen.

Delako bertsolaritzaren boom famatua amaiturik, aurtengo neguan entzulegoaren beherakada bat espero dute bertsolariek, joan den asteazkenean ETBko “Ez dago larrosarik” saioan Andoni Egaña eta Unai Iturriagak esan zutenez. Bere alde ona ere izango du horrek, benetako bertsozaleak izango baitira seguru asko boom-aren ondoren bertsolarien inguruan jarraituko dutenak. Bada liburu hau ezagutzen dutenak ez dira aparte izango.

Epaltzak hitzaurrean dioen bezala, beti dago honelako lan batean hutsune asko uzteko arrisku ezinbestekoa, baina hala ere ezin da ukatu liburua osatu dutenek, nork bere alorrean, tajuz eta ganoraz egin dutela lan, eta emaitza aberatsa dela benetan. Sei urte dira Euskal Herriko Bertsolari Elkarteak urteroko liburu honi bidea zabaldu zionetik eta —ez oztoporik gainditu gabe— asmo horri tinko jarraitzen dio. Zoriontzekoa da.

“Bapatean” honen urteroko erronka honi eusteaz gain, material gehiago ere argitaratu nahiko luke EHBEk, horretarako modurik balu, Juanito Dorronsorok doinuei buruz prestatutako lan sakon eta mardula esate baterako. Espero dezagun horretarako aukerak ere sortzea halakoren batean. Bitartean, goza dezagun “Bapatean 93” eder honekin.