susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« XVIII.eko lekukotasun bat erabilera bila | Etiopiatik haruntzago bada mundurik »

Kantu kontari / Florentino Goiburu / Patxi Iraola / Gipuzkoa Donostia Kutxa, 1991

Premiazko liburu egokia Joxe Beristain / Euskaldunon Egunkaria, 1991-01-26

Liburu ederra iruditu zait Bertsolari Eguna 91ko ospakizunekin batera bertsozaleok aise eta modu onean eskuratu ahal izan genuen hau. Behar-beharrezkoa gainera, Bertsolari Eguneko omenaldiak benetako edukina eta mamia izan dezan. Oso ondo bait dago bertsolariak omendu eta goraipatzea, baina omenik egokiena ez al da beren lana zabaldu eta ezagutzera ematea? Liburu hau egokia da horretarako, Florentino Goiburu eta Patxi Iraolaren berri jakin nahi duenak gogo biziz irakurtzeko modukoa denez gero.

Era honetako liburuak badute gainera halako xarma berezi bat, erraz eta gustora irakurtzen bait dira, intelektualidade handiko gorabeherak dituzten liburutzar horien aldean behintzat gozoak gertatzen dira eta, dudarik gabe.

Ez zuten asko pentsatuko ez Goiburuk ez Iraolak hemen kontatzen dituzten gertakizunak bizitzen zituztenean inoiz liburu baterako idatzi beharrean aurkituko zirenik, ez horixe! Baina horrelake izaten dira kontuak, eta hamaikatxo ezusteko eta sorpresa ematen digu bizitzak!

Liburua ederki hornitua dator hitzaurre, argazki eta agurreko bertso eta guzti. Amaieran aitortzen dute egileek “korrika eta presaka” egindako lana dela, eta seguru asko liburua apainago gertatuko zatekeen hala izan ez balitz, baina aldez aurretik epea jarrita lana egiteak horrelako murrizpenak ekarizen ditu azkenean. Beharbada kontutan hartu beharko da akats txiki hau datorren urteko liburua prestatzen hasterakoan…

Baina, kontuak kontu, hor dago liburua, eta nire ustez ondo betetzen du bere helburua, eta dudarik ez dago horrelako liburuak egiten segitu behar dela Bertsolari Egunaren inguruan. Eta oso ondo iruditu zaidan beste kontu bat salneurri apalarena izan da.

Ondo merezia zuten bi bertsolariok hala omenaldia nola liburua ere. Goierriko Bertsolari Taldekoek liburuari ezarritako hitzaurrean aitortzen dutenez, beren aitzindariak izan dira Goiburu eta Iraola, bertsolaritza gustokoa izateaz gain gogoz landu izan dutenak. Txapelketetan emaitza onak izan dituzte, eta Zepai Sariak aparteko eragina izan du biontzat, baina hala ere lagunarteko giroa da erosoen gertatu izan zaiena.