susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Izkutuko indarrak | Gerezi desiratuak »

Ene Ondarru / Andoni Basterretxea / Auspoa, 2000

Ondarroako kontuak Felipe Juaristi / El Diario Vasco, 2000-07-15

Joxe Mari Aranaldek idatzi du liburuaren sarrera modukoa egiten duen testua. Berari, Joxe Mariri alegia, lapurtzen dizkiot hitz hauek… “Don Andoni Basterretxea duzu gizona. Apaiza bera. Europako lehen gerra hasi zen urtean jaioa, “bixigu zaharrak al monton” egin behar omen den egunean jaio ere. Zer arraina jaio zen Ondarrun 1914ko urtarrilaren 17an!” Xehetasun gehiago ere ematen dizkigu Joxe Mari Aranalde lagunak. Seminarioan ikasi, mixioetan Ekuadorren eta Venezuelan zenbat urte; Ondarroara itzulita hango parrokian apaiz. Eta orain jubilatuen etxean bizi.

Ene Ondarru, ipuin liburutzat har daiteke lasai asko. Egia da oroitzapen liburua ere badela. Andoni Basterretxeak haurtzaroko eta gaztaroko kontuak ez ezik, mixioetakoak ere badakarzki, dotore asko ekarri ere. Horregatik, oroitzapenaz haratago doazelako idatzitako kontuak, graziaz eta estilo bereziz idatziak daudelako diot ipuintzat har daitezkeela. Irakurri besterik ez “Gertaerak” izeneko testuak.

Baina ez da hori bakarrik. Liburuko atal batek “Sorgin kontuak” du izena. Bertara bildu ditu egielak Ondarroan-eta entzundako aspaldiko istorioak. Kutsu majikoa edo iluna dute, sorgin kontuak dira gehienak, baina entzun bezala daude jasota, Ondarroan oraindik hitz egiten den euskara gozo horretan hain zuzen.

Sail batean bertsoak bildu ditu. Mila bederatziehundik hogeita hamasei bitarteko Ondarroako marinelen egoera kanatatzen dute bertsook. Hiru zatitan banatuta: lehengoan, urteko lau aroetako arranztaleen bizitza; bigarrenez, orduko emalkumeen lanak, hirugarrenez, jai-elizkizunak.

Liburu atsegina da. Ezusteko ederrak eta zoragarriak ematen ditu.