susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Suetena Belfasten | Paperetik zinemara »

Zure haragi bereko / Patxi Ezkiaga / Erein, 1996

Amodioa aitzakia Javier Rojo / El Correo, 1996-07-18

Liburu honetan Patxi Ezkiagak maitasunezko istorio bat kontatu nahi omen digu. “Omen” esan dut, zeren, nire ustez, hemengo amodiozko istorioa ez baita nobelaren elementurik inportanteena. Idazlea narrazio korapilatu batean murgildu da, plano eta maila desberdinak nahasiz. Alde batetik, amodiozko istorio baten momentu desberdinak kontatzen ditu (benetan istorio bakar baten aurrean bagaude). Bestaldetik, eta horrekin tartekatuta, pertsonaiek elkarri, edota beren buruari, kontatzen dizkiotenak agertzen dira. Honez gainera, maitasunari buruzko hausnarketak daude. Eta, amaitzeko, narraziotik kanpoko errealiteari dagozkion zenbait atal ere agertzen dira, “1989″ izenburupean. Gauzak horrela, zaila gertatzen zaio irakurleari plano bakoitza non hasi eta bukatzen den jakitea. Narrazio egiturari erreparatzen badiogu, ordea, txirikorda perfektua da nobela hau. Hainbeste narrazio-perfekziok, hala ere, ezkutatu egiten du argumentua, edukiaren aldetik elementu bakar bat nabarmentzen delarik: amodioari buruzko hausnarketa hori. Amodiozko nobela izan arren, liburu honetan ez da grinarik aurkituko, malenkonia fina baizik. Nobela honetan maitasuna ez da sentimendua, jakintzarako eta pentsamendurako abiapuntua baizik.