susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Esanahia | Heldutasunezko antzezlana »

Vladimir / Koldo Izagirre / Erein, 1996

Nor da Vladimir? Javier Rojo / El Correo, 1997-07-03

Koldo Izagirrek kontakizun berezi samarra egin du Vladimir izeneko liburuxka honetan. Kontakizunak, egia esan, oso nahasia ematen du, maila desberdinei dagozkien elementuak batera jartzen baititu, maila horiek bereiztu gabe. Lehenengo irakurketa batean, badirudi adoleszente batzuen gorabeherak kontatzen dituela, fantasiekin eta oroitzapenekin zipriztinduak, oinarrizko kontakizun hori gerrari eta iraultzari buruzko aipamenez beterik. Nahasketa honetan aurrera eta atzera jotzen du, behin honetaz, behin hartaz diharduelarik, irakurlearen koherentzia nahia zapuztuz. Honelako esperimentalimoen garaiak aspaldian pasatuak direla kontutan hartuta eta mundu honetan ingenuo gutxi gelditzen direla jakinda, bat testuaren atzean zerbait izkutatzen dela pentsatzera behartuta sentitzen da. Hots, kontakizun honek interpretazioren bat duela, zentzuren bat alegia. Interpretazioa (subjetiboa, noski) galdera honekin has liteke: Nor arraio da Vladimir? Zeren izenburuan eta narrazioan zehar agertzen eta desagertzen den pertsonaia honek funtzioren bat bete behar baitu kontakizunean. Bide honi jarraituta, agian testuak gordetzen duena idazlearen mamuekin antzaldatutako panfleto bitxi bat besterik ez dela izan ikusi ahal izango dugu.