« Publizitate gutxiko gasolinarekin | Harremanei buruz »

Bidezkoak / Joxe Ramon Zubimendi / Auspoa, 1997

Jatortasunaren inguruan Javier Rojo / El Correo, 1997-07-24

Joxe Ramon Zubimendik Bidezkoak izeneko liburu honetan El Diario Vasco-n argitaratutako artikulo bilduma eta “Labaien, hitz bitan” dokumentalaren gidoia aurkezten dizkigu. Atal handiena artikulo bilduma izanik, denetako gaiak erabiltzen ditu idazleak: bertsolaritza, euskara, herrietako kontuak… denetako gaiak baina badago denak lotzen dituen haria, herrikoitasuna alegia. Herrikoitasun honek, alde guztietara zabalduta, bere baitan liburu osoa biltzen du: gaiak nondik hartzen dituen, nola aztertzen dituen, erabiltzen duen euskara, eta honi buruz adierazten dituen iritziak… Zubimendi, Pello Esnalekin batera estilo liburu baten egilea dugu, eta hau nabari da bere artikuloetan, bertan estilo berezia erabiltzeko asmoa baitago, estilo jatorra, ahozko hizkeratik hurbil dagoen estiloa. Hau dela eta, zenbait gauza zehaztu behar direlakoan nago: hasteko, honelako estiloak bakarrik testu mota jakin batzuetarako balio duela; bestaldetik, euskaraz ez dugula eredu bakar bat, batez ere ahozko ereduak oinarritzat hartuz gero; eta hirugarrenez, gero eta sinetsiago nagoela estilo kontu hauek beren azpian ideologia kontuak izkutatzen dituztela. Izan ere, jatortasunak bere mugak dauzka, eta batek ez jakin zer den ondo idaztea.