susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hazia ereiten duen gezia | Ana Urkizaren “Gela ilunetatik” »

101 gau / Txiliku / Elkarlanean, 2000

101 gau Koldo Goitia edo Koldo Behetia / Ostiela!, 2001-04

Haur eta gazte literaturan izan da ezagunagoa Txiliku zarauztarra (Till Eulenspiegel-en ixtorio gatz eta pipertsuak ere itzuli eta moldatu zituen garai batean…; hizkuntza jostagai bihurtzen duten bi igarkizun liburu ere osatu ditu, “Axa mixa zilarra” tartean), baina duela bi urte, zenbai ipuin eder argitaratu ondoren, helduen narratiban egin zuen sarrera serio-serio “Hontzaren orduak” txalotuarekin. Honoko honetan, Xerezade berri bat bailitzan, 101 gauetan zehar, gauero pasarte bat idatzi digu. Irakurle amorratuaren sona du Txilikuk eta egia izan behar du, aldizkari hau ere irakurtzen duela igarri dugu. Tipo honek badaki, diogu kolkorako, ostielaratzeko moduko gauzak dauzka. Era guztietako gaiak eta osagaiak dakartza formula berezikoa den liburu pertsonal honek: mitologia klasikoa eta sineste berriak, esaera zaharrak nahiz pasadizo xelebreak, hala botanika nola zoologiarako gustua, han eta hemen bildutako adabakiak, inguruko nahiz urrutiko bitxikeriak, jakintza eta umorea batzen ditu… Plazerez idatzitako liburua dirudi eta egokia da plazerez irakurtzeko, eta plazerez ari garela, sexu-kontuak bezalaxe, piskanaka, gauero ataltxo bat irakurtzea gomendatzen digu egileak, nekatu ez gaitezen, baina denak, edo ahal direnak segidan irakurtzea ere ez da ideia txarra. Gu ez ginen gogaitu, oroitzapen ederra dugu oraindik.