« Bizkaiko kondairak | Jenioaren bizitza »

Alkarrentzat jaioak / Jose Azpiroz / Sendoa, 1997

Baserritarren bizitza Javier Rojo / El Correo, 1998-01-21

Jose Azpirozek euskal literaturaren ildo tradizionalenari lotutako eleberri bat burutu du Alkarrentzat jaioak izeneko idazlan honetan. Kontakizunaren ardatza neska-mutil batzuen maitasun historia delarik, ia-ia desagertutzat jo daitekeen baserritarren mundua aurkezten digu idazleak. Eta baserritarren giro horren berri zehatz-mehatz eman nahi zaigunez gero, ugari dira bizitza arruntari buruzko xehetasunak, batzutan gehiegi nire gustorako. Dena den, honelako kasuetan gertatu ohi denaren kontra, Jose Azpirozek ez du ahalegin berezirik egiten mundu hori idilikoa dela sinestarazteko, eta hau, benetan, eskergarria da. Mundu tradizional horretan denbora geldirik dagoela, pertsonaiak historiatik kanpo daudela ematen du, eta irakurleari kostatzen zaio askotan kontatutakoa noiz gertatzen den zehaztea. Modernitatea, historia pertsonaiak mundu horretatik ateratzean agertzen zaizkigu eta orduantxe hartzen du irakurleak garaiaren kontzientzia. Liburu honen idazkera ere aipagarria da, askotan ahozko kontakizun baten transkripzio hutsa dela ematen du-eta. Laburbilduta, gaiaz, ikuspuntuaz eta idazkeraz eleberri tradizionala dugu hau eta, nire ustez, ezaugarri hauek aldez aurretik onartu ezik ez zaio interesgarria izango irakurleari.