susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ipuin luze eta ederra | Iraungo duten ipuinak »

Isladak / Unai Iturriaga / Alfaguara, 1997

Idazkera ariketak Javier Rojo / El Correo, 1998-02-18

Sailkatzen zail xamarra da Unai Iturriagak Isladak izenpean idatzi duen liburu hau. Alde batetik, bere gustuko poemen antologia bat dugu, Iturriagak han-hemenka irakurri eta aukeratu dituen poemak biltzen baitira. Baina, honen ondoan, idazle honi poemok sortu dizkioten komentarioak agertzen dira. Aurkezpen modua ere horrelakoxea: ezkerreko orrialdean poema; eskumakoan Iturriagaren komentarioa. Komentario hauek gehienetan lekuen edo pertsonaien deskripzio txikiak, edota narrazio laburrak besterik ez dira, inpresionismo hutsez egindako testu xumeak. Batzutan, testu hauekin egileak poema nolabait osatu nahi du; bestetan, poemak kontatzen duena ikuspuntu desberdin batetik erakutsi nahiak bultzatu du idazlea horrelako testuak egitera. Baina emaitza ikusita, niri, irakurle honi, duda bat sortu zait liburu honen aurrean: zertara dator honelako komentarioak argitaratzea? zein interes eduki dezakete irakurle batentzat? Idazkera ariketa hutsak dirudite askotan, ia-ia idazten ikasi nahi duen pertsona batek egindako idazlan txikiak; oso eskematikoak, inolako sakontasunik gabeak; sentimentalismoz beterik eta pentsamendu gutxirekin. Nire ustez, idazleek irakurleen begiradatik gorde behar dutena plazaratu digu orrialde horietan Unai Iturriagak.