susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Idazketa eta lurraldea | Jasone Osoro, ahots xamur bat gure literaturan »

Galderen geografia / Felipe Juaristi / Alberdania, 1997

Mundua eta mindura Javier Rojo / El Correo, 1998-03-25

Felipe Juaristiren poesiaren zenbait giltzarri aipatu beharko banitu, hauexek azpimarratuko nituzke: errealitateak sortzen duen mindura, malenkoniaren presentzia, eta maitasunarena ere bai, ia-ia salbabide bakarra bailitzan… Izan ere, Juaristiren poesia subjektua eta munduaren arteko kontrajarpen ia erromantikotik sortzen da. Poetak oso ondo ulertzen ez duen (edo ezin ulertu duen) mundu batean ikusten du bere burua, eta mundu honen aurrean poesia erantzun gabeko galdera sorta bezala sortzen da. Egoera honetan gauza konkretu batzuetan baino ezin da aurkitu irauteko indarra, zeren poesiak, dagoeneko, ez baitu balio ideia edo sentimendu orokorrak adierazteko. Juaristik honelaxe definitzen du bere ekintza poetikoa: “Norberak bizi duen / Istant iheskorra harrapatu / eta beti guztirako bihurtzen saiatu” (64. orr.). Errekurtsoak direla-eta, irakurleari irudituko zaio liburu honetako poemak oso sinpleak direla. Ia-ia aforismoen antza hartzen dute askotan. Baina sinpletasun hau itxurazkoa baino ez da, estilizazio lan miresgarriaren ondorioz lortu baitu erretorikari askotan izaten duen apaingarri-kutsu guztia kentzea. Hitz gutxitan: bai kontzeptuen garapenagatik, bai estilizazio honengatik benetan liburu ona iruditu zait hau.