susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Bide berriak | Maupassant berriz eta ohorez »

Axularren historiak / Patxi Salaberri / Pamiela, 1998

Klasiko berritua Javier Rojo / El Correo, 1998-12-16

Patxi Salaberrik XVII. mendeko idazle klasiko bat, gure artean klasikoena hainbaten iritziz, irakurtzea proposatzen digu liburu honetan, eta, asmo hau gauzatzeko, irakurle arruntari, hau da, filologia kontuetan aditua ez denari, testu horietan agertu ohi zaizkion oztopo batzuk leuntzen saiatu da. Lehenengoa, ortografia. Salaberrik Axularren testuak gaurko ortografia sisteman ematen baititu, baina idazle klasikoaren idazkera eta bestelako hizkuntz berezitasunak ezertan ere aldatu gabe. Irakurlea, beraz, bere aldetik zerbait berria ikasteko gogoa jartzen badu, XVII. mendeko idazkeran sartu ahalko da, zeren azken finean hizkuntz zailtasunak ez baitira hain handiak. Salaberrik bere gain hartu duen beste lana Axularren Gero liburuan agertzen diren atal narratiboen aukera egitea izan da. Gero aszetika liburua delarik, kristau dotrina irakastea du helburu, eta zein bide egokiagorik, irakurlearen interesa piztu dezaketen istorio bitxiak, harrigarriak, batzutan lizun xamarrak ere bai, kontatzea baino? Horiexek aukeratu ditu edizioaren paratzaileak. Honelako liburuek frogatzen dute testu zaharretan aurki daitekeela euskal idazle interesgarririk eta narratzaile treberik, askok, ez jakinik edo, besterik pentsatzen badute ere.