susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Tratu klase asko | Bortizkeria urpean »

Oiartzungo kantutegia. Bertako herri memoriatik / Juan Mari Lekuona / Oiartzungo Udala, 1999

Herri kantuak Javier Rojo / El Correo, 1999-11-24

Juan Mari Lekuona poeta mirestua eta herri literaturaren ikertzaile bikaina dela esaten badut, inor ez da harrituko. Bere ibilbidean, bere liburuetan eta bere hitz pausatuetan guztiok zer ikasi handia daukagu, dudarik gabe. Oraingo honetan, Oiartzungo kantuen antologia ederra eskaini digu. Ia berrehun eta berrogeita hamar kantu jaso eta partitura eta guzti argitaratu ditu, bere herriko tradizioa ezagutzera emateko asmoz. Antologia zehatza eta zabala dugu, beraz, liburu mardul hau. Eta antologia ez ezik, ohar interesgarriz osatutako hitzaurre luze bat ere badugu, non gaiaren nondik-norakoak azaltzen zaizkigun. Hemen lanaren planteamendua adierazi ondoren, oroitzapen kolektiboaren gaia azaltzen zaigu argi bezain sakon. Kantuen azterketa sistematikoa ere egiten digu Lekuonak lan honetan eta honetarako hiru multzotan banatu ditu kantuak: kantu zaharrak, bertso berriak eta kantugintza berria. Honetan ere Lekuonak tradiziotik modernitatera joan daitekeen bide interesgarri bat erakusten digu, zeren herri tradizioan kantugintza berriaren aztarna azaltzen baitu. Irakurle mota desberdinek (herri hizkera, poesia edo musika gustuko dutenek) zerbait bitxi aurkituko dute liburu interesgarri honetan.