susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Amatakeran | Nihilismoa »

Ostiralak / Jon Arretxe / Elkarlanean, 1999

Xelebrekeriak Javier Rojo / El Correo, 2000-01-12

Literaturaren kontzeptua nahiko zabala izanik bere baitan izatez zeharo desberdinak diren testuak biltzen ditu. Arazo nabarmena sortu ohi da, ordea, guztiz izaera desberdineko testu horiek maila berberean jartzen badira. Kasu honetan, ezin dugu Jon Arretxeren liburu hau literaturaren ohiko balioen ikuspuntutik begiratu, literaturaren mozorroaren azpian (Ostiralak narrazio liburua da itxuraz) bestelako gauza eskaini baitzaigu, txiste bilduma luzea, alegia. Alde honetatik Arretxe azken urte hauetan euskal liburugintzan askotan ikusi izan dugun bidearen jarraitzailetzat har dezakegu, zeren idazle askok, umorezko liburuak egin nahirik, xelebrekeriaz betetako lanak argitaratzen baitituzte. Hemen ikasle bizitzan aldez edo moldez jarraitu nahi duten pertsonaiak ditugu protagonista eta bizitza horretan irauteko bururatzen zaizkienak dira kontagai. Irakurleak edozein gauzarekin barre egiteko gogoa badu, orrialde hauetan aurkituko du zerekin ase gogo hori. Burutazio bitxiak, egoera barregarriak (edo behintzat asmo horrekin eginak), irakurlearen konplizitatea bilatzen duten autoerreferentzia errezak aurkitu ahalko ditu irakurleak. Liburuaren negozioan mugitzen direnen aldetik, dudarik gabe, honelako lanak errentagarriak izango dira.