susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Kolorezko egunaren bila | Bertsolaritzen kronika »

Abertzaleak eta ezkertiarrak / Julen Zabalo / Elkarlanean, 2000

Nazionalismo teorikoa Javier Rojo / El Correo, 2000-10-25

Julen Zabalo ikuspuntu teoriko batetik saiatu da Abertzaleak eta ezkertiarrak izen adierazkorra duen liburu honetan abertzalea izatea zer den argitzen. Honetarako nazionalismo mota guztiak birpasatu ondoren, Euskal Herrian “hizkuntza-lurralde” nazionalismoa, non hizkuntzak batez ere funtzio sinbolikoa betetzen baitu, nagusi dela diosku. Mota honi aldaketa batzuk egitea proposatzen du “kultura-lurralde” nazionalismo baten alde agertuz. Hasieratik teoriaren ikuspuntua hartu duela esan digu, baina teoria, aldarrikapena eta etorkizunerako aurreikuspenak diruditenak nahasita agertzen dira, teoria liburuaren eta panfletoaren arteko mugak apurtuz. Edonola ere, liburuan esaten dena baino esanguratsuagoa iruditu zait isiltzen dena edo zehaztu gabe geratu dena. Zeren oinarri-oinarrian dauden zenbait kontzeptu garrantzitsu argitu gabe geratu baitira nire ustez: nazioa, lurraldetasuna edota kultura bezalako kontzeptuak behin eta berriro aipatzen ditu, zer diren edota zertan oinarritzen diren argitu gabe, horrela oso eztabaidagarriak izan daitezkeen puntuak saihestuz. Politikaz maila teorikoan mintzatzeak beste abantaila bat ere badauka. Euskal Herriko egoeraz eta egoera honen alderdirik mingarrienez ezertxo ere ez esatearena, alegia.