susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Umore kontuak | Hildakoen hatsa »

101 gau / J.M. Olaizola Txiliku / Elkarlanean, 2000

Kultur adabakiak Javier Rojo / El Correo, 2000-11-08

J.M. Olaizola, Txiliku ezizenaz ezagututako idazleak bitxikerien bilduma eskaintzen dio euskal irakurleari 101 gau izen “plagiatua” duen liburu honetan. Idazlana atal txikiez osatutako liburu zatikatua dugu, non denetariko istorioak eta istorio ez direnak ere agertzen zaizkigun. Liburuaren itxura hutsari erreparatuta, ezinbestekoa da Sarrionaindiaren edo Lertxundiren zenbait libururekin ez konparatzea. Mamiak Sarrionaindiak burututako horrelako liburuekin zordun dela erakusten digu. Kulturaren pilulak, entziklopedietako jakintza marginalak, eskaintzen zaizkio irakurleari, batzuetan interesgarriak, bestetan, ezagunegiak direlako edo, betiko kontuen itxura hartzen dutenak. Ehun eta bat ataletan gai batzuk errepikatzen dira (idazlearen buruaren inguruan zelatan daudenak), gaiak gaiari deituko balio bezala. Honelako bilduma liburuak euskal literaturan azpigenero bat osatzen ari dira, hainbeste idazleren zaletasuna ikusita. Adabaki-literatura dei geniezaioke genero honi. Edonola ere, zaila da honelako liburu batez literaturaren ikuspuntutik iritzirik ematea, orrialde horietan, berez, ez baita literatura egiten, irakurgaien bilduma baizik. Irakurleak gehiago eskatzen ez badio, interesgarria irudituko zaio, noski.