« Hildakoen hatsa | Dosi literario txikiak gauetarako »

Erakusaldiak. Antologia / Juan Bautista Agirre / Editoreen Elkartea, 1999

Erakusaldiak Javier Rojo / El Correo, 2000-11-15

Iaz agertu zen Juan Bautista Agirre (1742-1823), Asteasuko idazlearen idazlanen antologia hau, Erakusaldiak. Antologia izenarekin eta Fidel Altuna ikertzailearen ardurapean. Euskal literaturan behin baino gehiagotan aipatu izan da garai bateko idazleek aurrekorik izan ez balute bezala idazten dutela, beraien oinarrian euskal idazlerik ez balego bezala. Oraintsu arte bazirudien idazleek ez zutela aurreko belaunaldien lana aintzat hartzen, aurreko belaunaldi horietan (izen piska bat handia erabiliz klasikoak deitzen ditugunak) ezer aurkitzerik ez balego bezala. Agirre Asteasukoa iritzi hau oker dagoelako frogarik handienetako bat da. Izan ere, idazle xume honengan, XVIII. eta XIX. mendeetan elizkizunetan erabiltzeko sermoiak idazten zituen apez honengan, benetako narratzaile trebe baten hazia aurkitu ahal dugu. Gaurko irakurlearen ikuspegitik sermoi hauek kontakizunak balira bezala irakurri ahal dira: erretorikak eskaintzen dituen baliabideen bilduma, erlijioaz esaten dituenak bermatzeko hainbat lekutatik ateratako adibideen moduko istorio interesgarriak (eta dibertigarriak), aurreiritzirik gabeko idazkera baten adibideak… Gaurko irakurleak hori aurki dezake, liburuak irakurtzeko eskatzen duen ahalegin txikia egiten badu.