« Heriotza eta jaiotza | Bizitza badoa? »

Bestiarioa. Hilerrikoiak / Karlos Linazasoro / Elkar, 2006

Bestiarioa. Hilerrikoiak M. Egimendi / Aizu!, 2007-03

Bada denetarik gertatzen zaion jendea, baina ez da patu hutsa, jende horrek jarrera irekia izaten baitu askotan denetarik gerta dakion. Pertsona horietako bat da liburu honetako protagonista, supermerkatuan amonatxo bati gurdiko txanpona lapurtzeko edo auzokoa igogailuan harrapatuta uzteko gai den liburuzaina.

Karlos, ordea, eszedentzian dago, 50 urte dituela bere autobiografia idatzi nahian baitabil. Baina ezin du, beti jazotzen baitzaio lanean jartzea galarazten dion zerbait, benetako arrazoia edo aitzakia hutsa. Eskerrak senarra errealitatera itzularazten ederki asmatzen duen emazte praktikoa daukan!

Hasiera batean, irakurketan erabat murgildu arte, harritu egiten da irakurlea horrenbeste xelebrekeriarekin, baina behin erritmoa hartuta, hurrengo ustekabearen bila jotzen du irrikaz, “zer gertatuko ote zaio hurrena Karlosi?” bere buruari galdetuz. Eta istorioak ez du hutsik egiten, Karlosek inguruan bera bezain xelebrea den norbait aurkitu eta pasarte bitxiren bateko protagonista bihurtzeko ahalmena edukiko baitu berriro ere. Protagonista nahiko patetiko batekin kontakizun dibertigarria, arina, freskoa, esperpento kutsukoa, ironikoa… osatu du Linazasorok liburu honetan. Nola geratuko ote litzateke antzezlan bilakatuta? Esketx barregarririk behintzat ez litzateke faltako… Baina ez egon horren zain: irakurri eta gozatu!