susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Labartzari agur | Geure jokabideak, agertokian »

Mailuaren odola / Aingeru Epaltza / Elkar, 2006

Nafarroa historia Javier Rojo / El Correo, 2007-02-21

Arnas luzeko nobela idatzi nahi izan du Aingeru Epaltzak “Mailuaren odola” izenburuko liburuarekin, trilogia baten lehen urratsa baita. Nafarroako historiara jo du nobela honetan, XVI. mendeko giro gatazkatsua eta odoltsua kontatzeko. Honelako nobela historikoetan ohikoa den fikziozko egoera erabilita, kasualitatez aurkitutako eskuizkribuarena erabili du istorioa aurrera eraman ahal izateko. Izan ere, garai horretan bizi izandako pertsonaia batek kontatzen baititu, lehen pertsonan eta zahartzaroko talaiatik, aitonaren eta gazte-garaiko kontuak. Puntu honetaraino gauza berririk ez nobela historikoaren generoari dagokionez. Testuak, bestaldetik, eta ezin zitekeen beste era batez izan, zahar kutsua dauka, euskal literaturako klasiko barrokoak gogora ekartzen baititu, muturreko filologismoan erori gabe. Nobela historikoa da, baina kasu honetan adjektiboa (historikoa izatea alegia) nabarmentzen da beste ezaugarrien gainean. Pertsonaiaren ikuspuntua eskaini nahi du, baina honek behin baino gehiagotan historiagile modernoegia dirudi, narrazioaren ondoko gertakariak jakingo balitu bezala, eta here ibilbide pertsonala zurrunbilo historiko horretan lausotuta gelditzen da.