susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ezkutukoak desestaliz | Azalaren oroimena »

Zazpi kolore / Jon Arretxe / Elkarlanean, 2000

Zazpi kolore Castillo Suarez / Guaixe!, 2001-01

Narrazio multzo batek osatzen du Zazpi kolore liburua. Narrazioak zazpi kolore horien esanahiaren arabera daude sailkatuak: beltza (heriotza mendebaldean), grisa (denboraren igarotzea), gorria (ikara), horia (bakardadea), berdea (itxaropena), urdina (zoriontasuna) eta zuria (heriotza ekialdean).

Munduan barrena eginiko bidaietatik atera ditu Jon Arretxek istorio guztiak lehendabizikoa izan ezik. Hala ere, lehendabiziko narrazio hau -Euskal Herriko edozein ospitaletan gerta daitekeen heriotza mingarria duena hizpide- itxura batean tokiz kanpo dagoela badirudi ere, liburuaren giltzarria gordetzen du: koloreei ematen zaien balioa kulturaren arabera desberdina bada ere, balio horiek, alegia sentimendu horiek mundu osoan zehar berberak dira.

Pertsonaiak bitxiak diren aldetik, istorio politak bildu ditu Jontxuk lan honetan. Haatik, nahiz eta sentimenduak diren liburuaren ardatz, hanka-puntetan pasatzen da horien gainetik, sakondu gabe. Hori alde batera utzita, oso liburu polita dela esan beharra dago eta ez bakarrik edukiari dagokionean. Izan ere, aurkezpena ere ederra da. Cristina Fernández Blancoren marrazkiek eta orrialdeen koloreek -atalka tintatuak- liburua erakargarri egiten dute.