susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gandiagaminez | Bizitzaren argia »

Gaur ere ez du hiltzeko eguraldirik egingo / Iñaki Segurola / Alberdania, 2005

Hizkuntzaren erraietatik Javier Rojo / El Correo, 2006-03-01

Ziur aski, “Gaur ere ez du hiltzeko eguraldirik egingo” izeneko liburu hau azken bolada honetan euskaraz argitaratu den interesgarrienetako bat da. Oztopo bat besterik ez du Iñaki Segurolaren idazlan honek arrakastaren muga gainditzeko: saiakera da, eta ez nolanahiko saiakera. Saiakera liburu gehienetan ideia bat garatu nahi izaten du idazleak, askotan irakurlea konbentzitzeko asmoz. Eta nago liburu honetan idazleak ez duela ideiarik garatu nahi izan, ezta irakurlea konbentzitu ere. Zer garatzen da orduan? Hizkuntza bera, hitzak eta esaldiak, diskurtsoaren hizkuntzatasuna (barkatu hitza) nabarmendu nahi izan baitu liburu honetan. Euskaratik egindako pentsamendua da eta ez euskaraz islatutako pentsamendua, hizkuntza bera baita pentsamendu nagusia. Gauzak honela, batzuetan testua kontraesankorra da, eta hizkuntzatik sortutako pentsamendua adierazi nahian, koherentzia hutsarteak ikus daitezke. Zatikako idazlana da liburu hau, behin baino gehiagotan modernitatearen kontra ere aritzen dena. Laburbilduta, ideia borobilaren eta esaldi bikainaren artean hautatu behar duenean, idazleak beti bigarrenaren alde egiten du. Eta liburua esaldi bikainez beterik dagoela esan behar.