susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Gandiagaminez | Bizitzaren argia »

Bihotz gosetien kluba / Xabier Mendiguren E. / Elkar, 2005

Bihotz gosetien kluba M. Egimendi / Aizu!, 2006-03

“Ondo amaitzen diren istorioak ditut nik gustuko”. Inori holakorik entzunez gero eta noizbait liburu bat oparitzea pentsatuta edukiz gero, ez hautatu Xabier Mendigurenen ipuin bilduma hau. Irakurtzen hasterako, izenburuak berak eman diezaguke zer pentsatua, goseti hitzak ez baitu gure gizartean ospe handirik. Eta irakurketak baieztatu egiten du hasierako susmoa.

Dena dela, batzuei amaiera zoriontsurik gabeko ipuinak ez gustatzeak ez gaitu eraman behar liburua gomendagarria ez denik erabakitzera. Bost ipuinek osatzen dute Bihotz gosetien kluba, eta denek dute ezaugarri bat komunean: oso amaiera irekia dutenez gero, irakurlea irudikatzera bultzatzen dute, eta protagonistei etorkizunean zer gertatuko ote zaien pentsatzen jartzen da ezinbestean, hau da, irakurlea ipuinaren balizko amaieraren “sortzaile” bihurtzen da. Bestalde, gehienak errealitatean ezagutzen ditugun istorioen modukoak direnez, edozein egunetan gutako edonori edo lagunen bati gerta dakizkionak, ipuin irakurterrazak dira, agertzen diren sentimenduak ezagun egiten zaizkigulako. Protagonista guztiak dira bihotz gosetiak, denak maitasunez gose, baina amodio kontuetan ez dute zorte handirik. Batzuk, ezin patetikoagoak, amorrua ematerainokoak; eta beste batzuk, aldiz, irribarre triste eta samur baten eragileak.