susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Ibilaldiak | Urrutitik ekarria »

Bihotz gosetien kluba / Xabier Mendiguren Elizegi / Elkar, 2005

Maitasun bila Javier Rojo / El Correo, 2005-09-14

Xabier Mendiguren Elizegik etsipenari muzin eginez jarraitzen du liburuak idazten eta argitaratzen. Azken urte hauetan oroitzapenen liburuak izan dira bere produkzioaren atalik inportanteena, baina honetan narrazioari ekin dio. “Bihotz gosetien kluba” da bere azken emaitzaren izenburua, eta liburuaren izenak sarjentu baten banda alaia gogora ekar balezake ere, lotura hau izenean baizik ez da mantentzen: barneratutako erreferentzia kulturala, besterik ez. Liburu honetan bost narrazio biltzen dira, zeharo desberdinak tamainaren aldetik, zeren istorio laburren ondoan ia nobelatzat har litekeen baten bat ere badago. Guztietan antzeko gaia jorratu nahi duela ematen du, maitasuna bilatzen duten pertsonaia bakartiei buruzko istorioak baitira guztiak. Gehienetan, gainera, tonu jostaria eta dibertigarria erabiltzen da. Bi narrazio luzeenetan, adibidez, egoera xelebre xamarrak aurkezten zaizkigu, lankide batekin ligatzeko bidaia antolatzen duen pertsonaiaren presentziarekin, eta Heidi marrazki bizidunetako pertsonaiaz obsesionatuta, bere maitalearengan horren itxura bilatzen duen gizon barregarriarekin. Txantxetan hartzen bada liburua, dibertigarria eta guzti izan daiteke.