susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Kronika ipuinka | Tituluak dioena »

XX. mendeko poesia kaierak / Askoren artean / Susa, 2000

XX. mendeko poesia kaierak José Luis Padrón / Zabalik, 2000-12-16

Susa argitaletxeak, Gorka Arreseren interes egitetsuaz, haren poesiaganako jokaera zorionez txoroaz, olerkigintzan sinesten dugunon mesederako, jakina, gutxiengoaren literatur generoa izaten jarraitzeko bertutea duen horrek iragana, oraina eta, nola ez, etorkizuna ere bai duela erakusten digu.

Gainerako argitaletxe sonatuenek, Atxagaren poeman bezala “arrazoi komertzialak direla medio” kaleratu olerki liburu kopurua gero eta zenbagaitzagoa premeditatuki iragartzen duten bitartean, Susa argitaletxeak, ongi zaindutako euskal poesia erreferentea bihurtu du bere egiteko ausarta eta zaila. Ez dut argitaratutako poemario guztiak atsegin ditudanik esaten, zer egingo diogu, denon gustorako ez dira denak behar bezain hizkuntz poetiko onekoak izaten. Ezin ukatu, ordea, gure hizkuntza benetan gaixotzen utzi nahi ez badugu poetak zaindu behar ditugula. Negozioaren obsezioaz zalantzan gauden bitartean poesia argitaratu behar ote den ala ez, alfer-alferrik du kultura batek bere lur gaineko aldia. Esan dezadan, poetak babesten dituen herriak, zerbait hobearen esperantza gordeko du beti.

Hori ez behintzat, Susa argitaletxeak aurrez-aurre tratatzen du poesia, hori ezin ukatu. Nolabait esateko, poesia etxean bezala mugitzen da hor. Eta mendean zehar euskaraz egindako olerkigintzarekin lehen topo egiteko moduko tokia da XX. mendeko poesia kaierak bilduma. Ez dago batere arrazoirik topo egite horretara ez etortzeko. Ez gara garen guztiok hor ahal izanen, berrogei liburuz osatuko baita bilduma, baina jarrera, sentsibilitate eta ideologia desberdinetatik datozen egileak biltzen ari dira Koldo Izagirreren aukeraketa eta hitzaurreen arrimuan. Hauek dira argitaratutako lehen hogeiak: Orixe, Lizardi, Jokin Zaitegi, Salbatore Mitxelena, Iratzeder, Nemesio Etxaniz, Juan Mari Lekuona, Erdozaintzi-Etxart, Aresti, Azurmendi, Artze, Arantxa Urretabizkaia, Atxaga, Otamendi, Montoia, Itxaro Borda, Patziku Perurena, Iñigo Aranbarri, Luis Berrizbeitia eta Rikardo Arregi Diaz de Heredia.

Poesia ezagutu nahi duenaren gogo gustora dago hortxe. Bilduma trebea eta ederra.