Elektrika / Xabier Montoia / Susa, 2004

Aljeriako gerran Javier Rojo / El Correo, 2005-01-12

Xabier Montoiaren literatur ibilbidearen mugarri berria da “Elektrika” izenburua duen nobela hau, “Hilen bizimoldea” trilogiari amaiera jartzen diona. Honetan Aljeriako gerran kokatu du argumentua. Frantses armadako soldadu talde bat aljeriarren talde armatu baten atetik abiatu da. Hasieran edozein gudatan gertatzen den ohiko ekintza militarra badirudi ere, jazarpen honen kontaera garatu eta ia konnotazio mitikoak hartuko ditu. Batetik, aljeriar taldearen erasoak pairatuko dituzte frantsesek, jazarleak eta jazarriak nortzuk diren argi gelditzen ez delarik. Bestaldetik, Afrikako iparraldeko mendietan sartu ahala, frantses soldaduen basatikerien lekuko egiten gaitu idazleak. Infernuratze baten aurrean gaude, eta infernuratze honetan Jean Etxegoien izeneko pertsonaiaren presentziaren berri ematen zaigu. Iragan ilun, ezezagun baten jabe (gauza gutxi dakigu pertsonaia honek Afrikara joan baino lehen izan duen bizitzaz), baina erlijioaren eraginez kezka moralez beterik, bera izango da infernuratze horren adibiderik hautatuena, halako eran non nobela osoak azken lerroetan berak protagonizatuko duen eszenaren aurkezpen luzea baitirudi. Idazleak ohiko maila interesgarriari eutsi dio honetan ere.