susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Kezkak bideratzeko | Itsasondoko plazatik »

New Yorkeko kronika beltza eta beste kontu periferiko batzuk / Gotzon Garate / Elkar, 2004

New Yorkeko kronika beltza eta beste kontu periferiko batzuk Iban Auzokoa / Igela, 2004-10

Gotzonek berak esana da baserritarren etorria Beethovenen 9. sinfonia baino are ederragoa dela. Haatik, azken berrogei urteotan han hor hemengo baserritarren musika ezti hori jasotzen ibili da, gero guri ahal bezain goxoen kantatzeko. Inor gutxik konbina ditzakeen zazpi instrumentu, zein baino zein ederrago, galankiro tartekatuz eratu du Gotzonek bere azken kantuko orkestra; beste behin ere, jada hogeita hamaikagarren aldiz, Euskal Herri osoko musikari onenetako bat dela argi erakutsiz.

Bidaiari nekaezina, munduko lau bazterretan ibilia da Gotzon, hala nola Parisen, Bernan, Moskun, Rantxin… baina inon ez du New York adinako hiri kilikagarri eta pizgarrinik eriden. Uda bertan eman izan duen berrogei urteetan zehar hainbat eta hainbat kontu bitxi entzun, irakurri eta bizi izan ditu. Bada, bizipenok letretaratu ditu Gotzonek bere azken lanean.

Era berean, hogei urte pasa dira jada bere azken polizi eleberria, Alaba, argitaratu zuenez geroztik. Hogei urtetik gora beraz, hain maite ditugun geure detektibeen, Jon Garai, Haitz Zumeta eta Jon Bidarten berri azkenekoz jaso genuenetik. Tarte honetan euren jarraitzaileok ez dugu inongo liburutan hain detektibe on eta euskaldunen hutsunea betetzen jakin. Azken lanean Gotzon gurekin akordatu da eta Jon Bidarten kasu berri baten inguruko ipuintxo bat ekarri digu guztion pozgarri. Ea gerora besteen bere izateko aukera ere badugun.

Norbaiti entzuna diot, ongi, erraz eta aberats idaztea direla txukun izkiriatzeko hiru ezaugarri nagusiak. Bada, Gotzonek ederki betetzen ditu ezaugarriok. Eguzkiz eguzki bere aho-mihietan euskara soilik darabilten Euskal Herniko zazpi probintzietako baserritarrengandik urte anitzetan jasotako euskara darabil. Zail iruditzen zait edozein liburutan, honetan bezain euskara ona aurkitzea. Kontakizunak berriz ulerterrazak eta zeharo interesgarriak dira. Ez duzu erraz lortuko gau mahaitxoan aste bete baino gehiago irautea liburu honek. Orain, eginak egin gabekoari itxaron!