« Maitasunaren bila | Donostian bada literaturarako tokirik »

Amodiozko hogei poema eta kanta bat bakar-mindua / Pablo Neruda (Jose Luis Padron) / Gara, 2004

Neruda maitez Felipe Juaristi / El Diario Vasco, 2004-07-30

Aurten literaturaren mundua jai giroan bizia da, idazle askoren urteurrenak ospatzen baitira, eta urteurrenak, idazleena denean, aukera ematen du idazle horien bizitza aztertzeko eta haien lanak berrargitaratzeko. Neruda, Chejov eta Bashevis Singer ditut gogoan, bi Nobel Sari irabazle, eta maisua, ipuin laburretan noski.

Neruda poeta handia zen, eta Gabriel Celayak zioen moduan, poeta ozeanikoa, poeta erraldoia, ez fisikoki, noski, baina bai poetikoki. haren poesiak handitasunera jotzen du, gora, oso gora, zerura; edo bestela lurrean zehar zabaltzen da, lurraren muturra jo arte; eta desertuetan barrena ibiltzen da alderrai, desertu amaiezinetan. Dena zuen handi Nerudaren poesiak, arnasa, erritmoa, metaforak asmatzeko makina, handia eta, zehaztasunaren aurka, halako koka ezintasuna, adjektiboak eta metaforak, ihes eginik eta bakoitzak bere lurralde harturik, beren buruen jabe baino ez balira bezala. Bere libururik ezagunean seguru asko “Amodiozko hogei poema eta kanta bat bakar-mindua” hau izango da. Musikari askok hartu dituzte horko letrak eta musika duina jarri. Nola ahantzi Cuarteto Cedrónen hura, liburua irakurri baino lehenago poemak barne-muinetan sartzen zituztenak, irakurtzeko gonbitea eginez azkenik. bai, zerbait dute poema hauek, erori ez erori dabiltzanak, funanbulistak bezala, handitasunaren eta txikitasunaren aretan, edertasunaren eta itsuskeriaren artean zabaldutako sokan zehar. Cuarteto Cedrón izan zen lehena, argentinar doinu harekin, txiletarra zena kantatzen. Gero beste asko etorri ziren Neruda kantatzera, Pako Ibañez, Imanol bera ere bai besteak beste, eta gureak aipatzearren. José Luis Padrón ere gurea da, oso gurea, eta haren itzulpena irakurri ondoren benetan merezia du poeta izena. ez pentsa, edozeini eman ezina da, batzuek handi geratzen baitzaie halakorik eta besteei baldar.