kritiken hemeroteka

8.394 kritika

« | »

Neska baten memoria / Annie Ernaux (Aiora Jaka) / Igela, 2024

Bizitza lerroarteetan Asier Urkiza / Berria, 2024-11-03

Euskaratutako Annie Ernauxen zazpigarren liburua da Neska baten memoriaMemoire de fille jatorrizko izenburuan—. 2016an kaleratu zuen autoreak, hain justu, euskaraz ere aurki daitekeen Begira zenbat argi, maitea baino bi urte geroago. Azken hogei urteotan ohiko bilakatu zaio Ernauxen izena euskal irakurleari, itzulpen kopurua dela-eta batez ere. Are ohikoagoa 2022ko Nobel sariaren ondoren. Suediako akademiarenak haren lanak zabaltzeko eta argitalpenak ugaritzeko balio izan badu, gaitz erdi.

Gertaera zehatz bat berreraiki nahi izatetik abiatzen da liburua. 1958ko uda da, eta Annie Duchesne izeneko 18 urteko gaztea udaleku batera doa begirale aritzera. 50 urteren ondoren, ordurako idazle lanbideari emana, Annie Ernaux izeneko idazlea han izandako lehenengo sexu esperientziaz eta horrek ekarritako ondorioez idazten saiatuko da. Gertaerak berak eta protagonistaren gaztaroko bi urteren kronikak adinako garrantzia hartzen du liburuan hura berreraikitzeko autorearen ahaleginak. Akordura ekarri nahi du garai hori, garai hartako bere nia. Funtsean, bere burua ulertu nahi du hain arrotz zaion ni horri buruz idazten. Pasarte laburretan joango dira tartekatzen oroitzapenen kontaketa, idazlearen horien gaineko juzguak eta, batez ere, hura berreraikitzean sortutako duda-mudak.

Ondua da liburuko Ernauxen idazkera, bere lehenengo obretakoa baino pausatuagoa, halako leuntasun baten jabe. Harrigarria da, esaterako, nolako leuntasunez egiten duen jauzi lehenengo pertsonatik hirugarrenera, zein aise oroimenen denboratik idazketarenera, irakurlea konturatzeke ia. Autorearengan ohikoa den bezala, orobat, prosa arinez kontatzen ditu gertaera gogorrak, sumisioan oinarritutako lehenengo harreman sexualarena, kasurako. Duchesne neskatoarekin gupidagabe arituko da Ernaux, baina betiere ankerkeriarik gabe, gehiegizko lohitzerik gabe, hura —hortaz, bere burua— ulertzeko ahaleginean dabilenaren erabakitasunez baizik. Finean, neska hura ahazmenetik atera nahian ari da. Ernauxek dioen legez, kontakizuna, literatura aukeratu du horretarako, ezkutuko tolesak azaleratzen beste edozein baliabide baino zorrotzagoa delako.

Izan ere, idazketari buruzko hausnarketa dago pasarte askotan. Errealismo deitu izan zaion horren ikuspegi konplexua du Ernauxek. Haren literatura, itxuraz sinplea, muturreko apustu baten ondorio da. Bere bizitza ulertzeko tresna gisa ezartzen du Ernauxek idazketa, errealitatea deritzogun zera zehaztugabe horri neurria hartzeko modutzat. Hala, bestela atzemanezinak liratekeen eta, bitxiki, literaturak baizik jaso ezin ditzakeen fluxu horren zertzeladak harrapatzen tematzen da. Gertatu zena berreraiki nahi du bere burua deseraikitzeko eta lurperatutako lotsa hura, ezabatu bainoago, ulertzeko. Aipu honek ondo laburbiltzen du Ernauxen estiloa —autoreak berak galdetzen du ez ote den berau liburuko egiarik handiena—: “Ez naiz kulturala; gauza bakar bat axola zait: bizitza eta denbora harrapatzea, ulertzea eta gozatzea”.

Azken kritikak

Lagun minak
Jon Benito

Mikel Asurmendi

Francesco Pasqualeren bosgarren arima
Unai Elorriaga

Jon Jimenez

Neska baten memoria
Annie Ernaux

Asier Urkiza

Lautadako mamua
Xabier Montoia

Nagore Fernandez

Bihotz-museo bat
Leire Vargas

Bestiak Liburutegia

Neska baten memoria
Annie Ernaux

Paloma Rodriguez-Miñambres

Arkeologia haragitan
Beñat Arruti

Irati Majuelo

Norberak maite duena
Miren Billelabeitia

Amaia Alvarez Uria

Mendeku eskubidea
Ernesto Prat Urzainki

Jon Jimenez

Euri gorriaren azpian
Asier Serrano

Asier Urkiza

Rifqa
Mohammed el-Kurd

Ibon Egaña

Galbahea
Gotzon Barandiaran

Paloma Rodriguez-Miñambres

Mesfida zaitez
Bea Salaberri

Mikel Asurmendi

Gurpilak
Eztizen Artola Iturrate

Irati Majuelo

Artxiboa

2024(e)ko azaroa

2024(e)ko urria

2024(e)ko iraila

2024(e)ko abuztua

2024(e)ko uztaila

2024(e)ko ekaina

2024(e)ko maiatza

2024(e)ko apirila

2024(e)ko martxoa

2024(e)ko otsaila

2024(e)ko urtarrila

2023(e)ko abendua

Hedabideak