susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Satorraren bonba ustela | Nork egin zuen? »

Romain zen bere izena / Joxean Agirre / Elkar, 2003

Idazlearen bila Javier Rojo / El Correo, 2003-08-27

“Romain zen bere izena”, Joxean Agirrek idatzitako nobela, metafikziozko literaturaren esparruan sar daiteke. Hasteko, argumentuaren abiapuntua bitxia behintzat dela esan daiteke. Idazle batek bere nortasuna ezkutuan gorde nahi du, literaturzaleak harritzen dituzten idazlanak argitaratzen dituen bitartean. Idazlea nor den azaltzeko ikerketa talde bat eratzen da. Honekin batera, hilketa bat ere gertatzen da, ezkutuko idazlearen benetako nortasuna azaltzera-edo eramango duena. Nobelaren argumentua aurrera emateko ikerketaren hariari eusten zaio, baina narrazioa korapilatsua da, aldi berean ildo desberdinak jarraitzen dituena, zeren narrazio nagusi honen barruan bestelako narrazioak ere sartzen baitira, idazleak idatzitako obren laburpenak adibidez, metafikzioaren kezkak zuzentzen duen bide batetik. Gauzak honela, irakurlea adi egon behar da, bestela, zein mailatan dagoen ohartu ezean, galtzeko arriskua izan dezake, batzuetan markoarena egiten duen istorioa eta pertsonaiek kontatzen dituzten istorioak antzeko xamarrak dira-eta. Txantxaren itxura dauka denak, argumentu nagusi hori sorpresaka baitoa aurrera, hari koherenterik ez balego bezala. Edonola ere, honek ez du kentzen irakurketa dibertigarria denik.