« Ezagutzeko eta ekiteko | Lau elementuetarik »

Poesia kaiera / Ezra Pound (Luigi Anselmi) / Susa, 2018

Pounden poesia Javier Rojo / El Diario Vasco, 2018-09-15

Ezra Pounden poemen euskal bertsioa beste poeta bati zor diogu, Luigi Anselmi sinatzen duen euskal poetari. Beraz, alde honetatik begiratuta, ziur egon gaitezke antologia honetan agertzen diren testuek poetikotasunaren ezaugarria ez dutela falta izango, Luigi Anselmi gure artean dagoen poeta interesgarrienetako bat da-eta. Eta antologiaren atarian Beñat Sarasolaren, bildumaren arduradunaren, hitzaurre labur eta interesgarria dugu. Ezra Pounden poesia, beraz, itxura onarekin aurkezten zaio euskal irakurleari.

Poeta estatubatuarraren bizitza batez ere XX. mendean zehar garatu zen, 1885etik 1972ra bitartean hain zuzen, eta XX. mendean mundua astindu zuten gertakarien lekuko izanik, haien aurrean jarrera berezia mantendu zuen, askotan jarrera kontraesankorra edota ulertzeko zaila. Eta jarrera horrek neurri handi batean poeta bezala eman zaion lekua determinatu du. Poesiari bakarrik erreparatzen badiogu, abangoardia anglosaxoiko poeta moduan agertzen zaigu, testuinguru horretan modernismoa deitzen den mugimendu poetikoaren partaide. Abangoardiakoa izanik, Umberto Ecok lan irekia deitzen zuen horren adibidetzat har dezakegu: interpretazio anitz bideratzen duen poesiaren egilea dugu Ezra Pound. Baina ezaugarri horrekin batera, haren ifrentzuarekin ere topatzen gara, zeren Pounden poesia askotan iluna suertatzen baita, kriptiko samarra. Bere testuetan erreferentzia ugari agertzen dira, batzuetan oso pertsonalak, besteetan mundu klasikoari edota ekialdeko kulturari dagozkionak, eta irakurleak erreferentzia horiek guztiak ezagutzen ez baditu, poemen amaraunean galduta senti daiteke maiz. Kasu honetan hoberena irudien zurrunbiloan eta sentsazioetan murgiltzea da. Antologia honetan poetari buruzko ikuspegi nahikoa zabala eskaintzen da. Gauza bat bakarra botatzen dut faltan, poemei buruzko erreferentzia orokorren bat, noiz eta non argitaratu ziren, adibidez, testuak garaian kokatu ahal izateko.