susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bizi harrigarriak | Alkohola tarteko, giza paisaiak »

Xake mate / Alberto Ladron Arana / Elkar, 2002

Joku arriskutsu bat A. de Amezaga / Bilbao, 2002-11

Asko dira, irakurleak dakienez, euskal literaturaren barruan aurki ditzakegun sariak. Zutabetxo honetara orain ekartzen dugun liburu hau sariduna izan zen. Zehatz esanda: Ondarroako Udalak eta Elkar argitaletxeak antolaturiko Augustin Zubikarai I. saria lortu zuen lanaren argitarapena. Laburra luzeraz, II. Mundu Gerra ostera begiratzen du Alberto Ladron Aranaren (Iruñea, 1967) nobela honek. Kontalaria den pertsonaia printzipalak Alemanian kokatzen gaitu, han bizi baita bera. Egia esan bizitzak ez dio gauza handirik eskaini mutil gazte eta bakarti honi, zeinak gerra garaian hanka gabe geratu baitzen. Bere lagun bakarra xake jokoa izango da, bizitza ulertzen lagunduko diona… Eta baita borroka eskola gisa ere azalduko dena. Nazismoaren usaina nabaritzen da, autoreak giro beltzeko nobelak maite dituela… eta Jesus Mari Olaizolak, Txilikuk, esan duenez, Xake Mate-k irudiak sortzeko ahalmen handia duela. Urte hasieran, Augustin Zubikarai saria irabazi ondoren, Ladron Aranak aitortu zuen hemengo idazle gehienen ildotik aldendu nahi zuela nobela honekin eta “halako istorio bat idatzi behar nuela pentsatu nuen”, xake partida legez egituratuz. Lan hau ez da idazle nafar honi saritzen zaion lehenena (luzeena bai); ipuinen arloan badauzka zenbait (Iruñeko Udala, Tene Mujika…) eta joan zen urtean, Itzalaren baitan nobelarekin, Irun Hiria jaso zuen.