susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Nola idatzi klabe politikorik gabeko nobela politikoa | Balizko errotei irina sortarazi nahian »

Imentzioaren pergamuak / Juanra Madariaga / Bizkaiko Foru Aldundia, 1989

Hizkera poetiko propioa eduki nahia Anjel Lertxundi / El Diario Vasco, 1989-11-01

Bizkaiko Foru Aldundiak urtero ospatzen dituen Literatur Sarietako Olerkiarena irabazi zuen iaz Juan Ramon Madariagaren “Imentzioaren pergamuak” izeneko poemario honek.

Borondate poetiko garbi eta sakona dago liburuan zehar, nahiz liburuari buruz baino zilegiagoa litzaigukeen poema zenbaiti buruz mintzatzea (itsasoari buruzkoak, “Zera denean”, “Albaitator”…), gorabeherak (gorako une dexente, halere) dituen liburua bait da hau.

Juan Ramon Madariagaren liburuan ikusten da gure tradizioa eta modernitatea uztartzeko ahalegina (ditxosozko intertestualitatea euskal testuetan ere oinarritua dago), halako izadiarekiko ukitu lizardianoa, eta, bide batez, hizkera poetiko propio baten eraikuntzaren nahia, nahiz oihartzun bat baino gehiago jasotzen zaizkion (Sarrionaindiarenak, batez ere)…

Hasiberri gazte batena izateko jakin du poesiaren luberri propioa prestatzen Madariagak. Bidea markatu ere egin du. Eta hartu dituen aitaponte literarioek lagunduko diote, zalantzarik gabe, bidea egiten.