susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Talentuz blaitutako barneak | Kataluniaren begiak »

Harrotasuna eta aurrejuzguak / Jane Austen (Ana Isabel Morales) / Elkar, 2013

Klasikoaren itzulpena Javier Rojo / El Correo, 2014-04-18

Euskal liburuen argitarapena dela-eta, oroimen pixka bat dugunok buruan daukagu garai batean beste hizkuntza batetik euskarara liburu bat itzultzen zenean nola hurbiltzen ginen halako idazlanetara, beste hizkuntzetan ezagutzen genituen klasikoak euskaraz ere irakurtzeko irrikatan. Euskal itzulpengintzaren hasikin loriatsuak ziren eta hizkuntza oraindik ere lanabes zurrun moduan aurkezten zen. Eta bestalde, irakurle moduan, gu ere entrenamendu faltan geunden. Testuinguru horretan, itzultzaileak aritzen ziren ia-ia alferrikakoa ematen zuen borroka batean, beste hizkuntzetako klasikoak euskarara hurbiltzen. Hauxe etorri zait burura Jane Austen-ek idatzitako “Harrotasuna eta aurrejuzguak” izenburuko nobela euskal itzulpenean irakurtzean… Halako hasieren ondoren eta zailtasun guztiak gaindituz, euskal itzultzaileek lortu duten mailaren adibidetzat har dezakegu liburu hau, itzultzaileak, Ana Isabel Moralesek, lortu baitu itzulpen batez nire ustez esan daitekeen laudoriorik handienaren merezimendua: liburuan ez da itzultzailearen eskua nabaritzen. Itzulpena goi-mailakoa dela, alegia.

Bestalde, Jane Austen-en liburuari buruz, hain ezagunak diren beste klasikoei buruz bezala, zaila da gauza original eta berri bat esatea. Irakurleak liburu honetan zehar XVIII.mendearen amaierako Ingalaterran gizon eta emakumeen arteko harremanei buruzko disekzio bikaina aurkituko du, klase mailek markatutako eta mugatutako gizarte baten deskribapen ikusgarria. Bestalde, pertsonaien psikologian sakontzen jakin izan zuen idazleak, kritikak eta ironia bazterrean utzi gabe. Gaurkotasun handiko istorio bat aurkezten digu nobela, noizean behin komedia erromantikoaren kalifikazioa ere eman zaionak.