susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Mugarik gabeko begirada | Denak batera »

Zure bila itsasoa bidaliko dut / José Luis Padrón / Bermingham, 2002

Poetak itsasoa bidali digu minen sendagarri Mikel Asurmendi / Irunero, 2002-07

Udan gure bizimodua amiñi bat geldoago garatu ohi dugulako, udan gure minak azkarrago sendatzen edo usteltzen direlako, udan desirak fite asko gorritzen eta fite asko ahitzen direlako, “Zure bila itsasoa bidaliko dut” liburua zuregana bidaltzea bururatu zait.

Lurra (lehorra) eta itsasoa bikote bereiztezinak dira. Elkarren ondoan daude, elkarri elikatzen diote, elkar laztatzen dute, elkar osatzen dute, beren beharrak aitortzen dizkiote elkarri, eta elkarren baitan biltzen dira egunaren eta gauaren magalean.

Funtsean, lehorra eta itsasoa, bizitza eta heriotza bezalaxe, izakari baten bi aldeak dira, batek ez du bestea gabe izaterik. Eta bikote honen alboraezinezko jitea mina da. Mina izan daiteke lurra, eta mina izan daiteke itsasoa, bananduak nahiz biak batuak.

Jose Luis Padrónen liburuan mina itsasoa da, sekulan agortzen ez den mina. Eta gu, berriz, lurran gabiltza, hemendik harat, noraezean, iluntasunean. Eta argia bila gabiltzala itsasora hurbiltzen gara, itsasoa ukendu sendagarria bailitzan. Eta lurra (lehorra) mundu bihurtu zaigu, mundu ilun eta estua, gero eta ilunago, gero eta estuago.

Eta poetak itsasoa bidali digu minen sendagarri. Poesia argia baita edo iluntasunean bide egiteko hitzez osaturiko ukendua. Argia berebizikoa dugu biziko bagara, eta hitza ere bai. Hitza, ordea, sobera usatua dugu jada, ukendu marruskatuegia da hitza, hitzari erabiliaren erabiliaz diztira joan zaio, erabiltzearen poderioz hitzaren funtsa eta diztira uxatu ditugu.

Eta horregatik bizi gara minez, eta horregatik itsasoa bera minez dago, eta poetaren hitzak mingarriak dira, eta minak min, baliteke hitzok elkarren ondoan, elkar laztantzen, elkar osatzen, elkarri erantzuten, gure minen sendatzeko poemak osatu izana. Ez da samurra Jose Luis Padrónek bidali digun mina, itsasoaren bitartez eta honen izenean. Berauek gozatzea eta sendagarri bihurtzen gelditzen zaigu guri.