susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Beltza, azkarra, sinplea | Herri batzarraz »

Alter ero / Bertol Arrieta / Susa, 2012

Alter ero Lurdes Imaz / Aizu!, 2013-06

Bertol Arrieta (Zarautz, 1975) idazle, argazkilari eta zinemagilearen bigarren ipuin bilduma argitaratu du Susak. Zortzi narraziok osatzen dute Alter ero, eta izenburuak susmarazten digun legez, “beste ni” batekin aurkitzen diren pertsonaien istorioak kontatzen dizkigu, gizonenak guztiak.

Julio Cortazarren semea dela konbentzitu nahi gaituen idazlea, doktore tesia aurkeztu behar duen egunean beste bizitza batekin amesten duen irakaslea, ipuin perfektua idatzi nahian obsesionatuta hiztegietako hitz guztiak irakurtzen dituen idazlea… Europako beste muturrera ere joan zaigu protagonista bila idazlea, Sobiet Batasunaren garaiko eskubaloi selekzioaren kontakizuna baita Ordezko atezainaren balada. Horrelakoak dira Arrietaren ipuinen protagonistak. Euren barnean murgilduz, momentu barregarriak, absurdoak eta tristeak biziko ditugu.

Hasieratik erakartzen dute Arrietaren ipuinek, eta ia guztiek lortzen dute bukatu arte irakurtzen jarraitzeko grina. Hasierako hirurak dira, agian, erakargarrienak eta, erdialdean indarra galtzen duela uste dudan arren, Bye azkenarekin borobiltzen du liburua, espero ez dugun egoera batek emango baitio amaiera protagonistaren ezinegonari.

Zinemagintzaren ezagutza nabaria da Arrietaren ipuinetan, oso estilo bisuala erabiltzen duelako, baita erritmo bizia ere, eta pertsonaia xume, baina interesgarriak, eraikitzen asmatu duelako.