« Gure errelatoa idazteko saioa | Ongi etorri nire zirku intimora! »

Marlboro gizona / Mikel Zubeldia / Alberdania, 2012

Marlboro gizona Lurdes Imaz / Aizu!, 2013-01

Aurtengo Donostia Hiria-Kutxa saria irabazi du Mikel Zubeldiak (Donostia, 1972) Marlboro gizona ipuinarekin. Alberdaniak argitaratu du autore beraren beste bi ipuinekin batera: giro bereko Udal zoologikoa eta Salomón Weingarten.

Berrogeita hamar urte inguruko Dora Maggo margolari frantsesa da saritutako ipuinaren protagonista. Artea baliatu du beti Dorak bere bizitzan oreka bilatzeko eta, hala, momentuko egoeraren arabera, mota bateko edo besteko margoak egiten ditu: paisaiak, ondo sentitzen denean; bodegoiak, krisialdian dagoenean; erretratuak, momentu latzetan. Erretratuak margotzen dabil azkenaldian, gizon biluzienak, hain zuzen ere. Modelo bila dabilela, Marlboro gizona aurkituko du, eta hura margotu arteko ez du onik izango.

Gizonezkoekiko erreferentzia falta izugarria nabaritzen du Dorak, eta zigor moduan ekiten dio gizonezkoak margotzeari. Momentu desatseginak biziko ditu azken modeloa margotzen dabilela, misoginoa izateaz gain, zerria ere badela konturatzen denean. Badu bere morboa istorioak, Dorak emakumeak atsegin izan dituelako nerabezarotik.

Gustura irakurtzen da ipuina, erritmo arina duelako eta ederki jorratzen duelako artearen eta protagonistaren barne egoeraren arteko lotura, “emozioen pintura” delakoa. Horretaz gain, ondo islatzen du protagonistaren barne mundua, eta xehetasun asko ematen ditu pinturari eta margotzeari buruz.