susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bost idazle | Literatura »

Bost idazle Hasier Etxeberriarekin berbetan / Hasier Etxeberria / Alberdania, 2002

Arestik mailuz jotako harrizko mahaia Juan Luis Zabala / Euskaldunon Egunkaria, 2002-06-22

Hasier Etxeberriak plazaratu berri duen liburuan elkarrizketatutako bost idazleek —Bernardo Atxagak, Koldo Izagirrek, Anjel Lertxundik, Ramon Saizarbitoriak eta Joseba Sarrionandiak— ez dute belaunaldi bat osatzeko kontzientziarik. Boskoteko batzuk elkarrekin inoiz talde lanean aritu izan badira ere, nor bere bidea egiten ari da aspaldidanik, eta irakurleok ere ez ditugu inondik inora talde bereko kide egiten, joera bereko idazletzat hartzen.

“Literatura ulertzeko edo egiteko era bat eta bakarra erabiltzen ez badute ere, bostak teilatu berberak aterpetzen dituela sumatuko duzu”, dio, ordea, hitzaurrean, Hasier Etxeberriak. Ez du arrazoi faltarik.

Teilatupe komun horretan, Gabriel Arestik mailuz jotako harrizko mahaia aukeratu baitute lanerako bost idazle elkarrizketatuek, “esperantzazko esistentzia haundi bat” babes nagusi dutela, “egiak esateko negozio” beti malkarrotaren ertzekoan. Bost idazle Hasier Etxeberriarekin berbetan liburua Arestiri egindako omenaldi bat da, ezin zuelako besterik izan. Beste idazle eta eragile batzuek izandako garrantzia ere agerian geratzen da —Jon Mirande, Rikardo Arregi, Koldo Mitxelena…—, baina liburu osoaren irakurketak Arestik bost idazle elkarrizketatuengan izandako itzala nabarmentzen du batik bat, Aresti dela, halakorik izatekotan, liburuko bost gurpilak lotzen dituen ardatza.

Dudarik gabe, gogoz kontra eskaini zioten kalea baino ohore handiagoa da Arestirentzat Hasier Etxeberriaren liburua.