susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Mugarik muga | Puntu kardinalak »

Uso bat gehiago / Patxi Ezkiaga / Ibaizabal, 2002

Bizian poza Javier Rojo / El Correo, 2002-06-12

Patxi Ezkiagak argitaratu berria duen “Uso bat gehiago” izeneko liburu hau zein generoren barruan kokatu behar den zehaztea ez da erreza. Nik neu eleberritzat hartu dut, malgutasun handiko generoa baita hau. Testuaren abiapuntua eskutitz baten fikzioan dago: emakune batek (Mariak) bere lagun bati (Estherri) idatzi dio eskutitz bat, azken honek bolada txar bat pasatzen ari da eta. Eskutitz horretan Mariak Joxe Sabas izeneko pertsonaiarekin izandako erlazioaren berri ematen dio lagunari, nola, eskolan zegoela, apure hori ezagutu zuen eta zer nolako zirrara eragin zion. Joxe Sabas pertsonaia misteriotsua da, hari buruz ia ez baitago daturik. Bere ezaugarri nabarmena berak idatzitako testuak dira. Hauek osatzen dute liburu honen zatirik handiena, eskutitzarekin batera Mariak pertsonaia horrek idatzitako testuen bilduma bidaltzen baitio bere lagunari. Testu laburrak dira hauek, batzuetan epigramak diruditenak, askotan parabola itxurako kontakizun alegorikoak. Haietan bizitzaren filosofia erakusten du: naturalezaren aurreko jarrera, mirespenez betea, bizitzeko poza, baikortasuna…. Hain nahasia dirudien mundu modernoan honelako liburu batek lasaitasun apur bat hartzeko aukera eskaintzen du, mundua beste perspektiba batetik ikusteko.