« Sexuaren eta literaturaren amarauna | Urdin, azul, bleu, blue, blau… »

Zureak egin du / Iñaki Friera / Susa, 2009

Zureak egin du E.B. / Aizu!, 2010-02

Hiru gertakari lotzen zaizkio bat-batean kazetariari eta hortik aurrera dena korapilatzen da, tentsioak azkeneraino irauten duen Iñaki Frieraren azken eleberri honetan.

Ospitalean erizain aritzen den neskalagunak tratu txarrak jasandako emakume baten kasua kontatzen dio; nagusiak tratu txarrei buruzko erreportajea egiteko eskatzen dio, ikerketan sakonduz eta ikuspuntu pertsonala landuz; eta, bi aste geroago, gutunazal bat helduko zaio erredakziora, barruan mezu kriptiko bat eta emakume bati parking batean emandako jipoi izugarria agertzen den bideoa dakartzala. Hiru gertakariok ikerketa korapilatsura eramango dute gure nobelako protagonista, eta Iñaki Frierak, biktimaren bizipenetatik haratago, tratu txarrek inguruan eragindako bizipen eta sentipenak aletzen ditu, intrigaz eta ezustekoz beteriko eleberrian, nahiz eta ia hasieratik jakin nor den “gaizkilea”.

Tratu txarren arazoaz baino haratago doa, beraz, Friera, eta giza harremanen sare korapilatsua erakusten digu maisuki, batzuen eta besteen sentimenduak agertuz eta, geure burua egoera bortitz baten aurrean aurkituz gero, elkarren arteko erlazioak nola harildu daitezkeen muturreraino erakutsiz.

Erraz irakurtzen den prosa arinean idatzita, azken orrialderaino zer gerta zain egongo da irakurlea, Frieraren idazkeraz gozatzen duen bitartean.