susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Haize hegoaren aroak | Jantziak »

Salbazioko armada / Abdela Taia (Patxi Zubizarreta) / Alberdania, 2007

Europa helburu Javier Rojo / El Correo, 2007-09-19

Abdela Taiak idatzitako “Salbazioko Armada” izenburuko nobela hau literatura postkolonialaren eredu ikusgarria iruditu zait, fenomeno kultural honetara hurbiltzeko adibide interesgarria. Abdela Taia izeneko protagonista agertzen zaigu, idazlearen izen-deitura berberak eta biografía datu berberak dituen gazte marokoarra, Europara joango dena bere ikasketetan jarraitzeko eta Frantziako kultura distiragarriaren jabe egiteko. Genevara eramango duen ibilbide pertsonala kontatzen da nobelan. Nobelak eredutzat hartua ahal izateko osagai guztiak dauzka. Adibidez, pertsonaiaren aukera sexualaren inguruan eraikitzen da argumentua (eta batzuetan ematen du probokatzeko asmoarekin egina dela), Europara eramango duen ibilbidea bere homosexualitatearen garapenarekin batera gauzatzen baita. Ibilbide honetan Jean izeneko pertsonaia europarrarekin topo egingo da eta honek ezagutaraziko du Europa mirestua. Baina nobelan pertsonaia baten ibilbide partikularra kontatzen bada ere, osagaiak asmo sinbolikoz aukeratuta daudela dirudi eta Jeanek Abdela seduzitzen duenean Europak Magreb seduzitzen duela esan daiteke. Frantsesez idatzitako nobela interkulturala, azken finean.