susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Klasizismoaz | Ahots matxinatua »

Zakurra zeure laguna / Gotzon Garate / Elkarlanean, 2002

Aurrekoaren ildotik Arantza Etxebarria / Idatz & Mintz, 2003

India harrigarria irakurri dogunoi ezaguna egingo jaku liburu honen itxurea eta egiturea. Liburua ez da lineala. Herren ordez, hainbat kapitulu nagusi hartu dira ardatz, hala nola, txakurren ezaugarri orokorrak, ohiturak, heziketarako aholkuak eta abar, eta atal nagusi horreen barruan azpiatalak eon dira adibide konkretuakaz. Horregaitik, ez jaku arraro egin behar txakur bera (Artsai, Bat, Mendi…) kapitulu baten baino gehiagotan agertzea, egitate desbardinen erakusgarri. Txakurren arrazak, portaerea, txakurren inguruko barriak —ez beti onak— eta txakurren psikologiaren barri be emon deusku Gotzonek.

Liburu autobiografikoa da, txikitako abenturakaz hasi eta gaur egungoak be batu dauzalako. Izan be, Gotzonek Elgoibarko jaiotetxean txakurrak ebazan eta gaur egun be, Deustuko Unibersidadean, txakurrei gauhez jaten emotea dau ilusinorik handienetakoa.

“Umetan etxean izaten genuen zakurra, eta gero, atzerrian urte mordoxka eman ondoren, Euskal Herriko baserrietan ibiltzen hasi nintzenetik, berriz ere zakurrekin ibiltzeko zoriona izan dut. Deustuko Unibertsitatean ere bi polizia zakur ditugu”.

Liburua arin-arin irakurten da, azpiatalak sano laburrak direalako. Ganera, ez dago azpiatalok alkarren segiduan zertan irakurri, nahiko autonomoak direalako berez. Baina, nire eretxian, liburuko atalik erakargarrienak azken kapituluak dira, hau da, txakurrari buruzko atsotitz eta esapideena eta, zelan ez, beste ikuspuntu batetik hen bai, hitzatzea: “Bere jabeari zakurkume batek idatzitako eskutitza”.

Gotzonek bere bizipenak hartu dauz oinarri hau liburuau idazteko. Urteetan Euskal Herriko bazter guztietako hainbat baserritatik ibili eta gero, oroitzapen guztiak bildu dauz eta liburu itxuran emon deuskuz, jakingarri interesgarri askogaz batera Txakurrak maite dauzenentzat erakargarria izango da liburu hau irakurtea, gauza ezezagun asko ikasi leitekez eta. Gotzonek berak be, hitzaurrean, argi dinosku zergaitik eta norentzat idatzi dauan liburua:

“Zergatik idatzi dudan liburu hau? Zakurrak maite ditudalako. Zakurren ohoretan. Nirekin beti borren maitagarri jokatu duten animaliok euskaraz gorazarre bat merezi zutela iruditu zitzaidan”.

“Zakurrak maite al dituzu? Zakurren laguna al zara? Etxean zakurrik al duzu? Zakur bat zure ondotik igarotzerakoan, begiratu guria egiten al diozu? Bai? Orduan irakur ezazu liburu hau. Ziur baino ziurrago, gogokoa izango duzu. Hemen agertzen diren gertakizunak egiazkoak baitira, gure lagunoi gertatutakoak”.

Txakurzale ez direnek ez daiela liburu hau irakurri, horrenbesteko maitasunak ausika itoko dauz eta.