« Literatur-zoperna, sorpresa jenerala | Azukrea belazeetan »

Piarra Topet Etxahun / Xipri Arbelbide / Elkar, 1987

Piarra Topet Etxahun Xabier Mendiguren / Argia, 1988-01-17

Ez dago dudarik Etxahun barkoxtarrak euskaldunen buruak lanean eta lumak dantzan jartzeko gaitasun aparta duela, horrenbeste denbora pasa eta gero. Lehen ere hari eskaini zion Haritschelhar irakasleak euskal poetei eskaini zaien tesi bakarrenetako bat, eta haren bizitza kontatuz burutu zuen Jon Etxaidek Joanak joan elaberri mardula.

Neri hala ere, eta liburu honi nagokio, izugarrizko ausardia iruditzen zait inoren biografia nobelatua egitea.

Elaberri bezala holako gehienek ez dute meritu haundiegirik izaten, gaia aldez aurretik ezaguna izaten baita eta teknika berritasun gutxikoa. Biografia berriz, ene uste apalez askoz errespetu gehiago eta zientifikotasun zorrotzagoa eskatzen duen histori generoa da: ezin ibil daiteke honen eta beste haren pentsamendu, irrika eta sentimendu izkutuak zer nolakoak ote ziren asmatzen. Alde honetatik beraz, ez ur eta ez salda.

Badu bere meritua halere: Etxahun zen pertsonaia miragarria hobeki ezagutu nahi duenak hementxe du era atseginean haren berri jakiteko aukera, Xipriren euskara ederra dastatzearekin batera.

Elaberri honek 86ko Kafe Iruña eskuratu zuen, eta jakin dugunez argitaratzeko zorian dago Etxahunen bertso ezagunen bilduma, zubereraz eta batuaz, Xiprik berak paraturiko edizioan.