Hitzezko txirlorak / Luis Baraiazarra / Elkar, 1985

Hitzezko txirlorak Iñaki Camino / Argia, 1985-05-05

Sari pranko jasoa dugu Baraiazarra bizkaitarra. Bere poesiak Olertin kaleratzen ditu idazle honek, Karmel aldizkarian ere lanean iharduki. Liburu honetan lau olerki sail argitaratu ditu: “Askatasunen maitale”, Iparragirrenen lehen heriotz mendeurrenean lehen saria jasorikoa, “Neure bostean kantari”, Ondarroako lore jokoen mendeurrenean bigarren saria jasorikoa. “Bertso helduak/Bihotz barnean bilduak”, Markina Xemeingo lore jokoen mendeurrenean aurreneko saria hartuta, 1983, eta atzenik “Bakardade bertso ezpalak”, 1984.eko Lizardi saria.

Neurriaren beharra duen olerkaria dugu Baraiazarra, olerki guztiak neurtuz, errimatuz eta ia bertsoz (asko ta asko ederki landu eta burututako bertso sailak direla esan baitaiteke) osatzen ditu ta: zortzikoak, koplak eta tradizio eta erritmo handiko eskemak aukeratzen ditu. Olerkari zuzena dela esan liteke, ez bait da idarokitzean oinarritzen, erritmoz beteriko mezu zuzen jantzian baino.

Berak, Elantxobe herria zuzen deskribatuko digu, edota monastegi zaharrean arrats trixturan aditutako gregorianoa, amaren egunsentiko jeikitze eta otoitza, hego-haizearen emea, ibaieko ur kutsatuen oldar ezin geldituzkoa, Peru Abarkaren jakituria, bere gelako kuadroen iruditeria, kaieko emakumeen sare-kononketa orduko marmar eta hizpidea, Iparragirreren urrun-mina, krabelinari darion liraina edota gabon gauean bere bakardadean duen gogoeta mozkortia. Beste gairik ere bada tradizioz beterik diren olerki landu hauetan.